Kandidati i Lidhjes Demokratike të Kosovës për kryeministër, Lumir Abdixhiku, ka reaguar pas rezultatit të zgjedhjeve të përgjithshme, duke shprehur mirënjohjen për mbështetësit e tij dhe qytetarët e Kosovës.
Në një postim në rrjetet sociale, Abdixhiku falënderoi votuesit, qytetarët dhe veprimtarët për angazhimin e tyre në këtë proces zgjedhor.
Ai theksoi se rritja e LDK-së është një hap i rëndësishëm, por pranoi se kjo nuk ishte e mjaftueshme për të sjellë ndryshimin e kërkuar në nivel shtetëror. Ai shtoi se ky rezultat ofron mundësi për një organizim më të mirë të brendshëm të partisë.
“Faleminderit të gjithë votuesve tanë që mbështetët Lidhjen tonë. Faleminderit qytetarëve të Kosovës që nderuat demokracinë e atdheut tonë. Faleminderit veprimtarëve tanë për punën dhe pasionin që keni investuar në këto zgjedhje. Asgjë nuk mungoi!”, shkroi Abdixhiku.
Abdixhiku theksoi gjithashtu se procesi i numërimit të votave, përfshirë ato të diasporës, është ende në vazhdim, dhe pas përfundimit të tij, LDK do të shpalosë qëndrimet e saj për hapat e ardhshëm.
Ndërkohë, LDK ka siguruar deri tani 17.68% të votave, me 90% të votave të numëruara.
