Zgjedhjet që do të mbahen më 4 dhjetor për krerët e Federatës Shqiptare të Atletikës kanë sjellë tensione dhe akuza të ashpra, pasi ka pretendime për manipulime në listën e anëtarëve që do të votojnë.
Luiza Gega, një nga atletet e njohura shqiptare, ka deklaruar për A2 se vetëm në dy muajt e fundit janë krijuar katër shoqata, të cilat pretendohet se do të përdoren për të ndikuar në rezultatet e zgjedhjeve.
Sipas Gegës, këto shoqata janë formuar nga fillimi i tetorit, me të fundit që është regjistruar më 10 nëntor. Ajo theksoi se për një shoqatë të bëhet anëtare e Federatës, ajo duhet të pranohet nga federata si anëtare provizore dhe më pas të regjistrohet në gjykatë. Pas katër vitesh, këto shoqata kanë të drejtën të votojnë në asamble.
Gega shprehu shqetësimin se, kur Taulant Stërmasi u zgjodh president, ai refuzoi të njihte këto shoqata dhe nuk i konsideroi si të rregullta, pasi asnjë nga asambletë e mëparshme nuk ishte pasqyruar në gjykatë.
