Këtë vit fitues të ‘Eurovision 2022’ u zgjodhën grupi Kalush Orchestra nga Ukraina, të cilët përfaqësuan vendin e tyre me këngën “Stefania”.
Ndërkohë që kanë kaluar disa javë nga eventi i madh i muzikës, grupi fitues ka marrë një vendim të rëndësishëm në lidhje me çmimin e tyre.
Orkestra Kalush ka shitur trofeun për 900,000 dollarë amerikanë, për të mbledhur para për luftën në Ukrainë.
Ndërkohë që mikrofoni i kristaltë është shitur në një ankand në “Facebook”, me qëllim të blerjes së dronëve për ushtrinë ukrainase.
Bëhet e ditur nga prezantuesi ukrainas, Serhiy Prytula se paratë e mbledhura nga shitja e trofeut do të përdoren për blerje të tre dronëve ukrainas PD-2, ka raportuar agjencia e lajmeve, Reuters.
Theksojmë se Trofeu është shitur në ditën kur bendi është shfaqur në një koncert bamirësie në Berlin, me qëllim të mbledhjes së parave për kujdes shëndetësor dhe furnizime tjera, shkruan REL.
Duke folur gjatë koncertit, anëtari i grupit, Oleh Psiuk ka bërë thirrje që njerëzit të mos mësohen me luftën, e cila ka lënë 4,031 njerëz të vdekur dhe mbi 4,730 të plagosur, sipas Kombeve të Bashkuara.
Numri i luftëtarëve të vdekur nuk dihet ende.
Pushtimi rus në Ukrainë – i nisur më 24 shkurt – ka nxitur mbi 14 milionë njerëz të ikin nga shtëpitë e tyre, derisa qytezat janë shndërruar në gërmadha.
“Mendoj se lufta duhet të jetë në ballina gjithmonë, derisa të kemi paqe”, ka thënë Psiuk.
