Ish-kryeministri italian, Massimo D’Alema, tregoi detaje nga përpjekjet e qeverisë italiane për të siguruar lirimin e liderit historik të Kosovës, Ibrahim Rugova, gjatë një konference të mbajtur sot për të shënuar 25-vjetorin e çlirimit të Kosovës. Rugova ishte burgosur nga regjimi i Slobodan Millosheviçit në atë kohë.
Duke folur para të pranishmëve në konferencë, D’Alema ndau një anekdotë interesante nga një bisedë që pati me presidentin e atëhershëm të SHBA-së, Bill Clinton. “Ishte e padiskutueshme që duhej të lirohej Rugova. Qeveria e Italisë mori përgjegjësi për lirimin e Ibrahim Rugovës dhe kam biseduar dhe me presidentin e Italisë në atë kohë dhe ishin të bindur për vendimin që duhej ndërmarrë,” u shpreh D’Alema.
Clinton kishte shprehur shqetësim se, nëse Rugova do të lirohej, NATO nuk do të kishte arsye për të vazhduar bombardimet. D’Alema gjithashtu zbuloi se gjatë një konference në Romë, ku ishte falënderuar NATO dhe populli italian, ai personalisht i kishte kthyer falënderimet, duke theksuar se meritat i takonin Rugovës.
Ish-kryeministri italian theksoi gjithashtu rolin e Rugovës si lider paqësor dhe intelektual, i cili kishte ndërtuar një sistem paralel arsimor dhe social në përpjekje për të ruajtur identitetin dhe aspiratat e popullit të Kosovës për pavarësi. Ai shtoi se edhe pse europianët fillimisht mendonin se Rugova përfaqësonte të kaluarën dhe lufta kishte marrë një rrjedhë të pamundur për t’u ndalur, më vonë u vlerësua gjerësisht si një autoritet që kishte dëshirën dhe mbështetjen e qytetarëve të Kosovës për të udhëhequr vendin.
