Dalja jashtë planit të përcaktuar në planin kombëtar të vaksinimit është gati e zakonshme për kreun e qeverisë.
Dje kryeministri Edi Rama ka deklaruar se vaksinimi do të vazhdojë më bluzat bardha, por përsa i përket të moshuarve, ai tha se do të vaksinohen të parët ata që janë personalitete në shoqëri.
“S’kemi pasur asnjë humbje jete si rezultat i bllokimit total dhe karantinimit total. Për rreth 1000 persona, vaksinimi do përfundojë këtë javë, ndërkohë që po shtrihet në të gjithë rrjetin e bluzave të bardha. Sot janë prezent dhe mjekë nga Mati dhe Bulqiza, nesër do jemi në Vlorë, do vazhdojmë me zonën poshtë. Do vazhdojmë me një numër tjetër të moshuarish që janë personalitete, që duhet t’i mbajmë sa më mirë dhe jo thjesht të kujtohemi kur vdesin e të mbajmë fjalim“.-tha Rama dje nga Stadiumi Air Albania, ndërsa po priteshin dozat e reja të vaksinave.
Një deklartë e till nga i pari i shtetit, përvec diferencimit dhe privilegjimit që i bënë një shtrese të popullsisë, hedh dyshimet se procesi i vaksinimit që u vonua deri më tani do të jetë i padrejtë.
Më herët kryeministri në daljet e tij publike ka deklaruar se nuk do të ketë dallim mes personave që do të vaksinohen.
“Asnjë ministër, asnjë deputetë, asnjë drejtor, që nuk është mbi 75 vjeç nuk do të ketë asnjë privilegj të kësaj natyre.”, tha Rama më 15 janar.
Sipas tij të parët që do të vaksinoheshin do të ishin mjekët që janë në vijën e parë të luftës dhe më pas moshat e thyera si grupmosha më e prekur nga virusi.
Por startegjia e re e qeverisë Rama tregon qartë natyrën e vetë qeverisë në diferencimin dhe dallimin e theksuar mes shtresave, duke i dhënë më shumë rëndësi një personaliteti se një qytetari të thjeshtë.
