Kryetari i KQZ, Ilirjan Celibashi, ka kërkuar nga Kolegji Zgjedhor të shqyrtohet me urgjencë kërkesa e PS për ankimimin e 22 deputetëve të PD.
“Pa cënuar pavarësinë e Kolegjit Zgjedhor dhe duke respektuar paanësinë tuaj në vendimmarrje, kërkojmë nga ana juaj përshpejtimin e shqyrtimit të ankimimit kundër vendimit nr.9, datë 23.03.2021.”, thuhet në njoftim.
Me anë të një letre zyrtare, Celibashi, kërkoi sot shqyrtimin më herët se data 31 mars, që u lajmërua.
Kujtojmë se Partia Socialiste ka depozituar një kërkesë në Komisionin Qendror të Zgjedhjeve, ku i kërkon KQZ të shkurtojë 78 kandidatë nga lista e PD-Aleanca për Ndryshim.
KAS vendosi të mbante listën e PD-AN me 222 kandidatë, ndërsa KQZ sanksionon që lista duhet të ketë 153 emra. Tashmë vendimi është në dorë të Kolegjit Zgjedhor që ende nuk është shprehur.
Pjesë nga njoftimi:
“Pa cënuar pavarësinë e Kolegjit Zgjedhor dhe duke respektuar paanësinë tuaj në vendimmarrje, kërkojmë nga ana juaj përshpejtimin e shqyrtimit të ankimimit kundër vendimit nr.9, datë 23.03.2021, “Për Shqyrtimin e kërkesës ankimore”… (vazhdon sqarimi), për arsye se çdo vonesë, krijon pamundësinë e miratimit të përmbajtjes së fletës së votimit, e cila ndikon në procesin e prodhimit dhe shpërndarjes së fletëve të votimit brenda afateve të përcaktuara.”-thuhet në kërkesën e firmosur nga kryetari i KQZ, Ilirjan Celibashi.
