Kërkesa e SPAK për përjashtimin e gjyqtares, Iliriana Olldashi në gjykimin e ish-kryeministrit Sali Berisha dhe dhëndrit të tij, Jamarbër Malltezi, është rrëzuar.
Sipas gazetares Anila Hoxha mësohet se gjyqtarja Miliana Muça që do të shqyrtonte këtë kërkesë, e ka hedhur poshtë.
Kujtojmë se SPAK kërkoi largimin e saj Olldashit, pasi ajo thuhet se ka konflikt interesi. Iliriana Olldashi ndryshoi masën e sigurisë për Jamarbër Malltezin nga “arrest me burg” në “arrest shtëpie”. Sipas SPAK ajo nuk duhet të gjykojë më dosjen për ish-kompleksin Partizani, ku janë të përfshirë Berisha dhe Malltezi.
Ndërkohë, vendimi i saj për Berishën është detyrim paraqitje dhe moslargim nga territori shqiptar, duke mos dashur të ndryshojë asnjë masë për ish-kryeministrin e vendit.
Berisha e ka cilësuar si sulm politik hetimet e SPAK-ut ndaj tij dhe dhëndrit Malltezi, duke akuzuar se kjo strukturë e lartë gjyqësore është në duar e Ramës.
