Ish-kryebashkiaku i Lushnjes, Fatos Tushe ndodhet në burg që prej qershorit 2021 për shpërdorim dhe shkelje te barazisë në tendera.
Ndërkohë që ditën e sotme, Gjykata e Posaçme e Apelit ka bërë të ditur lajmin që ka marrë sot vendimin për shuarjen e masës së sigurisë “Arrest me burg” ndaj Tushes. Ish-kryebashkiaku i Lushnjës, Fatos Tushe, është liruar nga burgu, pasi kanë përfunduar afatet e paraburgimit.
Gjykata e Apelit ka pranuar kërkesën për liri pasi ka përfunduar dënimin e dhënë nga Shkalla e Parë, raporton “EuroNews Albania”
Njoftimi për mediat:
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Florjan Kalaja kryesues, Igerta Hysi anëtare dhe Dhimitër Lara anëtar, sot më datë 26.01.2023, zhvilloi seancë gjyqësore për çështjen penale nr. 28 akti, datë 25.01.2023 regjistrimi, regjistruar mbi kërkesën e të pandehurit F.T., për konstatimin e shuarjes së masës së sigurimit personal “arrest në burg” dhe vendosi:
– Konstatimin e shuarjes së masës së sigurimit “arrest në burg” të caktuar ndaj të pandehurit z. F.T., me vendimin nr. 50 datë 05.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar.
– Urdhërimin e lirimit të menjëhershëm të të pandehurit z. F.T. nga ambientet e paraburgimit nëse liria e tij personale nuk kufizohet për një shkak tjetër ligjor.
