Djali i ish-udhëheqësit Muammar Gaddafi, i cili u rrëzua gjatë kryengritjeve të vitit 2011, është liruar nga burgu, siç raportojnë mediat ndërkombëtare.
Saadi Gaddafi u nis menjëherë me një avion për në Stamboll, tha një burim zyrtar për agjencinë e lajmeve Reuters.
Gjatë kryengritjes së 2011, 47-vjeçari iku për në Niger, por u ekstradua në Libi në vitin 2014 dhe që atëherë ka qenë i burgosur në Tripoli.
Ish-futbollisti profesionist u akuzua për krime të kryera kundër protestuesve në vitin 2011 dhe për vrasjen e trajnerit libian të futbollit Bashir al-Rayani në 2005. Ai u lirua nga akuzat për vrasjen e al-Rayani në prill të vitit 2018.
Një burim në zyrën e prokurorit i tha agjencisë së lajmeve AFP se “kryeprokurori kërkoi, disa muaj më parë, për ekzekutimin e vendimit në lidhje me Saadi Gaddafi sapo të ishin plotësuar të gjitha kushtet e kërkuara”. Ai ishte i lirë të qëndronte në vend ose të largohej, shtoi burimi.
Në 10 vite pas kryengritjes ku u vra Gaddafi dhe tre djemtë e tij, në Libi ka pasur kaos. Një armëpushim në vitin 2020 i dha fund luftimeve fraksionale dhe hapi rrugën për bisedimet e paqes dhe formimin e një qeverie kalimtare në mars. Zgjedhjet janë planifikuar të mbahen dhjetor.
Një burim zyrtar i tha Reuters se lirimi i Saadi Gadafit rezultoi nga negociatat që përfshinin figura të larta fisnore dhe kryeministrin Abdul Hamid Dbeibeh. Ndërsa një burim tjetër i tha agjencisë se negociatat përfshinin edhe ish -ministrin e Brendshëm Fathi Bashagha.
