Lirohet ish-deputeti Kastriot Islami i cili u shoqërua në Komisariatin nr.2 në Tiranë. Në momentin e ndalimit nga policia, Islami ishte duke ecur te diga e Liqenit Artificial pa e mbajtur maskën.
Ai nuk u ka paraqitur efektivëve një mjet identifikimi, ndaj edhe është shoqëruar për në komisariat, ndërkohë që pas 1 orë e 30 minuta është lënë i lirë.
Me anë të një postimi në rrjetet sociale, Islami është shprehur se ishte duke bërë ecje sportive si çdo ditë. Ai akuzon Edi Ramën ai që e ka ndaluar dhe izoluar për 1 orë e 30 minuta.
“Jam në shtëpi…! Si çdo ditë, po bëja ecjen e përditshme me veshje sportive nga parku i Tiranës në drejtim të shtëpisë… Gjykoj se ishte Edi Rama që më ndaloi dhe forcërisht me izoloi në komisariat për rreth 1 ore e 30 minuta… Sepse ju prezantova që jam Kastriot Islami dhe përsëri përdorën forcën ndaj një profesori dhe një figure publike… ! Më shumë ndoshta do të sqaroj në vijim… Falënderoj të gjithë ata miq që më mbështetën me telefonata dhe mesazhe”, shkruan Islami.
Ai ka refuzuar të japë shpjegime kur ka dalë nga komisariati, ndërkohë që pritet që çështja t’i kalojë prokurorisë pasi policët pretendojnë se Islami i ka ofenduar dhe me forcë nuk ka pranuar të tregojë kartën e ID.
