Liga Profesioniste nuk do të tërhiqet dhe konfirmon edhe një herë bojkotin e Superligës, për të qendruar stoik ndaj kërkesave që i kanë bërë qeverisë.
Ditën e sotme në ambientet e FSHF-së u zhvillua mbledhja me 9 përfaqësuesit e Superligës ku mes tyre ishte dhe sekretari i përgjithshëm i FSHF-së, Ilir Shulku, presidenti i Ligës Edvin Libohova dhe Marjus Sulejmani shefi i garave.
Në fund të mbledhjes, presidenti i Ligës Profesioniste, Edvin Libohova, mësohet se është shprehur shkurtimisht:
“Pas diskutimeve u vendos që të vazhdojnë, deri në momentin e zgjidhjes së kërkesave. Jemi në pritje të një takimi me qeverinë. Vendimi për të vazhduar bojkotin ishte unanim”
Ndërkohë kujtojmë se kërkesat e Ligës së Futbollit për qeverinë janë miratimi i një ligji për sponsorizimet sipas propozimit të klubeve, përfshirjen e çdo aktiviteti ekonomik të futbollit në TVSH-në e reduktuar në masën 6 për qind, anulimin e gjobave e kamatëvonesave për detyrimet fiskale të prapambetura, dhe përjashtimin nga tatimi të të ardhurave të futbollistëve me 10 vjet, jo me 2 vjet sipas vendimit të qeverisë.
