Detaje të reja janë zbardhur nga hetimi për vrasjen e ish-policit, Santiago Malko në Tiranë.
Gazetarja Klodiana Lala ka thënë për rubrikën “Opinion” në “News24”, se është ndryshuar akuza për Blendi Tetën.
Ai tashmë është nën hetim edhe për veprën penale “Vrasje me paramendim”.
Rezulton se Teta ka lidhje të fortë me personat e dyshuar për vrasjen e Malkos.
Ai gjithashtu ka aplikuar për një vizë për në Kubë.
Sipas Lalës, nëse SPAK do të hetojë pasuritë e personave të dyshuar për vrasjen e Malkos, do të zbulohen lidhje me zyrtarë të lartë.
Më tej ajo shtoi, se nëse dosja nuk do të fokusohet vetëm në vrasjen e Malkos, do të zbardhen edhe shumë atentate në Durrës, Tiranë edhe Laç.
“Kjo ngjarje do të zbardhet, madje mendoj se do të preken emra të njohur të botës së krimit, që mund të jenë përfshirë në këtë ngjarje, por edhe në ngjarje të tjera kriminale. Nëse SPAK do hetojë gjitha pasuritë e tyre, lidhjet e tyre me politikën dhe zyrtarë të lartë, do të kemi një sërë ngjarjesh të tjera që do të zbardhen. Nëse dosja nuk do fokusohet vetëm te vrasja e Malkos, do zbulohen shumë vrasje të ndodhura në Tiranë, Laç e Durrës, në të kundërt këta persona do të arrijnë t’ia hedhin. Kjo do ishte një dramë e madhe, pasi askush nuk kishte të drejtën t’i merrte jetën Malkos. Secili duhet të mbajë peshën për atë që i takon”, tha gazetarja.
Ndër të tjera ajo zbuloi se klani Duka, përgjegjës për ekzekutimin e Malkos, merret me trafik drogërash të forta, kryesisht kokainë.
Mësohet se më herët atyre u janë sekuestruar dy automjete të blinduara me targa ruse.
“Ka dyshime të forta që ky grup kriminal merret dhe me trafikimin e lëndëve narkotike. Leonard Duka u arrestua në prill të këtij viti. Në momentin e arrestimit, ai hodhi pistoletën nga banesa. Janë një grup i organizuar dhe më parë janë sekuestruar dy automjete të blinduara me targa ruse. Eksponentë të krimit të organizuar kanë lidhje të ngushta e të forta me punonjës të policisë, ndaj dhe ndonjëherë duke i përdorur ata, e ndonjëherë duke paguar shuma të mëdha, ja kanë hedhur drejtësisë. Kjo ngre dyshime të forta për mënyrën se si funksionon policia shqiptare. Ka dyshime të forta se Leonard Duka është kreu i një grupi që merret me trafikimin e drogërave të forta. Është arrestuar një herë për kokainë, ndërsa tani rezulton të jetë organizator i vrasjes së Santiago Malkos. Ai rezulton i përfshirë dhe në një vrasje në Laç, i përfshirë në vrasjen e ndodhur në zonën e ish-Bllokut. Ishte filmuar me armë në dorë, por policia nuk kishte reaguar për ta arrestuar. Ka dyshime që Duka ka vepruar si grup i strukturuar kriminal, ndaj dhe Prokuroria e Tiranës e kaloi dosjen te Krimet e Rënda, dosje që pritet të sjellë mjaft surpriza”, theksoi Lala.
