Mijëra qytetarë nga e gjithë bota qëndruan në radhë për orë të tëra për t’i bërë nderimet e fundit Papa Françeskut, trupi i të cilit është vendosur për homazhe publike në Bazilikën e Shën Pjetrit, para funeralit shtetëror të planifikuar për të shtunën.
Vatikani njoftoi se do të marrin pjesë mbi 130 delegacione dhe rreth 50 krerë shtetesh, përfshirë Presidentin e SHBA-së, Donald Trump, dhe 10 monarkë. Funeralin do ta ndjekin miliona të tjerë përmes transmetimeve televizive në mbarë botën.
Për të siguruar një ceremoni pa probleme, autoritetet italiane kanë vendosur masa të rrepta sigurie në Romë, me snajperë në çatitë përreth Vatikanit, monitorim ajror me dronë dhe pajisje ushtarake për neutralizimin e çdo objekti fluturues të dyshimtë.
Papa Françesku, i cili ndërroi jetë të hënën në moshën 88-vjeçare, udhëhoqi Kishën Katolike për 12 vjet dhe ishte i njohur për përpjekjet e tij për reformim dhe përballje me krahun konservator.
Në një gjest përulësie, ai kishte kërkuar të varroset në Bazilikën e Shën Mërisë së Madhe, dhe varri i tij do të jetë i thjeshtë, me vetëm emrin “Franciscus” të gdhendur në mermer. Gjatë kortezhit funeral, një grup i varfërish dhe nevojtarësh do të mirëpresin arkivolin e tij.
