Gjashtë licenca të reja minerare për gjashtë zona të reja do t’i shtohen listës së atyre që ka deri tani në administrim Ministria e Infrastrukturës dhe Energjisë.
Procedura konkurruese për interes të subjekteve private, do të jetë e hapur deri në 10 dhjetor datë në të cilën do të bëhen të ditura dhe ofertat e secilës palë.
Ajo që bie në sy është fakti që këto leje, nuk janë për minerale metalorë, por për ato ndërtimorë.
“Kërkohet që të realizohet aplikimi për leje minerare për zonat minerare konkurruese Nr. 270, Nr. 376/8, Nr. 121/6, Nr. 841/2, Nr. 70/12, Nr. 61, të miratuara në planet vjetore të viteve 2012, 2013, 2015, 2016 dhe 2019”,- thuhet në dokumentin e MIE.
Në total janë gjashtë zona ku zona e parë është ajo minerare Nr. 270, Objekti “Vlorë”, Qarku Vlorë, lloji i mineralit ranor pllakor dhe veprimtaria shfrytëzim. Vlera minimale e investimit parashikohet të jetë 26 milionë lekë në vit.
E dyta është zona minerare Nr. 376/8, Objekti “Konisbaltë”, Qarku Berat, lloji i mineralit gëlqeror, veprimtaria shfrytëzim. Vlera minimale e investimit është 19.5 milionë lekë në vit.
E treta zona minerare Nr. 121/6, Objekti “Zall Herr”, Qarku Tiranë, lloji i mineralit gur gëlqeror, veprimtaria shfrytëzim me vlerë investimi minimal 19.5 milionë lekë.
Zona e katërt është ajo minerare Nr. 841/2, Objekti “Zhabjak”, Qarku Tiranë, lloji i mineralit konglomerat, veprimtaria shfrytëzim. Edhe në këtë rast vlera minimale e investimit e kërkuar për një vit është 19.5 milionë lekë.
Zona e pestë minerare është ajo Nr. 70/12, Objekti “Lepenicë”, Qarku Vlorë, lloji i mineralit gëlqeror i mermerizuar, veprimtaria shfrytëzim. Vlera minimale e investimit për një vit prodhim minimal është 26 milionë lekë.
Zona e fundit minerare ishte ajo nr. 61, Objekti “Lazarat”, Qarku Gjirokastër, lloji i mineralit gëlqeror, veprimtaria shfrytëzim me vlerë minimale investimi 19.5 milionë lekë.
Nxjerrja e këtyre zonave minerare në konkurrim vjen në një kohë kur ka pritshmëri për rritje të kërkesës së mineraleve ndërtimore, e lidhur kjo sidomos me procesin e rindërtimit, i cili po zbatohet nga qeveria në funksion të strehimit të atyre që iu shkatërruan banesat nga tërmeti i vitit të kaluar.
/Burimi: MIE/ GazetaReforma.com/
