Teksa Lezha i frikësohet ndonjë përmbytjeje me ardhjen e dimrit, bashkia ka vendosur të japë tender miliona lekësh për fasada. Më datë 13 tetor 2023, është publikuar kontrata me fituesin e tenderit me objekt “f+v materiale dhe pajisje për arredimin, ndriçimin skenik dhe fonisë së Pallatit të Kulturës”, me fond limit 250 milionë lekë. Por problemi nuk qëndron vetëm te fakti që zhvillohet një tender për mirëmbajtjen e Pallatit të Kulturës, pasi edhe pse mund të ketë nevoja më imediate, nuk është diçka e keqe investimi në kulturë. Problemi qëndron se Ndreu duhet të bëjë më mirë shpërndarjen e fondeve në kushte të tilla dhe të paktën të zhvillojë prokurimet siç ia kërkon ligji.
Në fakt, për kryebashkiakët tanë është pothuajse e pamundur të që të zbatojnë rregullat, sidomos kur bëhet fjalë për para.
Në dokumentet që Gijotina.com i disponon, zbulohet se janë paraqitur 3 oferta, por njëra në mënyrë fiktive. Kështu kompania “M. LEZHA” rezulton pa ofertë ekonomike, ndërsa firmën STELLA” SH.P.K, Ndreu e ka skualifikuar nga gara që në fazën e parë.
Pra, bashkimi i operatorëve “E M K O” SH.P.K, dhe ASLV” SH.P.K. me ofertë 240 milionë lekë mbeti i vetmit në tavolinë. Oferta e tyre u shpall menjëherë fituese pa garë dhe pa shqyrtim të kritereve që kërkon ligji mbi prokurimet.
“E M K O” SH.P.K, në pronësi të në pronësi të Shaelda Memës është e njohur për qindra miliona lekë që merr nga kryebashkiakët për t’iu arreduar zyrat dhe sallat e propagandës. E M K O është një kompani e preferuar nga pushteti. Vetëm në 2 vitet e fundit ka përfituar 630 milionë lekë tenderë. 40% janë dhënë nga Bashkia Tiranë, ku dominojnë kontratat me mangësi të theksuara dhe prokurime me “Flamuj të kuq” për shkak të korrupsionit nga ana e zyrtarëve. Ndërsa pjesa tjetër janë dhënë çdo vit nga bashki të tjera sërish me tenderë pa garë.
Tenderi për “arredimin” ka fituar “Red Flag” sipas vlerësimit të Open Data për shkak të shkeljeve që paralajmëron risk për korrupsion.
Eh, në nisjen e punës nga SPAK-u, Ndreu ishte një nga ata që thoshte se do të shohim rezultate të mira në drejtësi. Asaj kohe ai shprehej se opozitarët kanë frikë nga SPAK-u. Me sa duket nuk e kishte parashikuar se edhe kryebashkiakët e Rilindjes shkojnë në qeli, si ai i Lushnjes, Fushë Arrëzit apo i Bulqizës.
Fillimisht do të ishte mirë që Agjencia e Prokurimeve të kryente një hetim administrativ, përpara se KLSH dhe SPAK-u ta hapin këtë dosje dhe të gjejnë parregullsitë!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016./Gijotina.com
