Një lëvizje tjetër është bërë në listat e Partisë Demokratike mëngjesin e kësaj të shtune. Mësohet se PD i ka besuar postin e rëndësishëm ish-deputetit Endri Hasa.
Hasa është emëruar Koordinator Kombëtar për Teknologjinë e Komunikimit dhe Informacionit e Dixhitalizimit.
Ky post i rëndësishëm i besohet ish-deputeti Hasa në prag të zgjedhjeve parlamentare të 25 prillit.
Partitë politike kanë nisur tashmë fushatën elektorale, teksa gjatë javës së kaluar publikuan edhe listat e kandidatëve për deputetë.
Kujtojmë se një tjetër lëvizje është bërë dy ditë më parë në qarkun e Elbasanit. U rikthye në garë Luciano Boçi, I cili do të garojë I nënti në listat e PD në këtë qark.
Ish-deputeti nuk figuronte në listat paraprake të Partisë Demokratike, ndërsa mësohet se ai nuk ka qenë dakord me një vendim të tillë. Po ashtu në listat e PD u vu re mungesa edhe e emrave të tjerë të njohur mes të cilëve Klevis Balliu, Halim Kosova etj.
Për demokratët do të kandidojnë figura të njohura si prezantuesja Ori Nebiaj, futbollisti Gentian Muçaj, shkrimtarja Flutura Açka apo analisti Mark Marku. Vetë Lulzim basha do të kandidojë i pari në listën e Tiranës, ndërsa pas tij vjen Jorida Tabaku.
I gjashti në listën e Tiranës renditet ish-kryeministri Sali Berisha. Partia Demokratike dorëzoi mbrëmjen e djeshme pak para përfundimit të afatit listat me kandidatët për zgjedhjet e 25 prillit, në Komisionin Qendror të Zgjedhjeve. Më vonë kreu i PD, Basha kërkoi edhe një afat për korrigjim pasi kishte pasur gabime.
