Kryeministri italian Giuseppe Conte do të japë sot dorëheqjen, një lëvizje taktike që synon maksimizimin e shanseve të tij për të udhëhequr me një qeveri të re.
Conte do të mbajë një takim kabineti në 09.00 të mëngjesit, njoftoi zyra e tij në një deklaratë.
“Këshilli i Ministrave thirret për nesër në mëngjes, në orën 9 të mëngjesit, gjatë së cilës Kryeministri, Giuseppe Conte, do t’u komunikojë ministrave vullnetin e tij për të shkuar në Quirinale për të dhënë dorëheqjen. Më pas, kryeministri Conte do të shkojë te Presidenti i Republikës, Sergio Mattarella”, thuhet një njoftim nga Pallati Chigi.
Kryeministri i Italisë mbijetoi në të dy dhomat e parlamentit javën e kaluar, pasi ish-kryeministri, Matteo Renzi shkaktoi një krizë politike duke tërhequr partinë e tij “Italia Viva” nga koalicioni qeverisës. Sidoqoftë, votëbesimi në dy dhomat e parlamentit e la Conten në pushtet, por vetëm me një shumicë të dobët dhe ai që atëherë nuk ka arritur të forcojë mbështetjen.
Sipas mediave atje, Conte ka qenë nën presion nga dy partitë kryesore të koalicionit – Lëvizja Pesë Yje (M5S) dhe partia Demokratike (PD) – për të dhënë dorëheqjen paraprakisht para votimit të së Mërkurës, në mënyrë që të ketë një shans më të mirë për të marrë një mandat nga Mattarella për të formuar një qeveri të re të mbështetur nga një koalicion më i gjerë.
