Menjëherë pas lëkundjeve të forta të tërmetit Ministria e Mbrojtjes ka bërë reagimin e parë në lidhje me tërmetin me epiqendër në Greqi që shkundi Shqipërinë e katër vende të tjera në rajon. Në njoftimin zyrtar të bërë nga ministri Niko Peleshi thuhet se deri në këto momente nuk raportohen dëme, megjithatë të gjitha strukturat e emergjencave civile janë në gatishmëri të plotë për të evidentuar e reaguar ndaj çdo situate. Peleshi shton se intensiteti i tërmetit vlerësohet paraprakisht 6 ballë sipas shkallës MSK-64.
Njoftimi i Ministrisë së Mbrojtjes: Lëkundjet e tërmetit që u ndjenë edhe në vendin tonë e kishin epiqendrën në kufirin mes Maqedonisë së Veriut dhe Greqisë, sipas të dhënave paraprake nga IGJEUM, rreth 40 km në Veri-Lindje të Bilishtit me magnitude 5.6 sipas shkallës Rihter. Intensiteti i tërmetit vlerësohet paraprakisht 6 ballë sipas shkallës MSK-64. Edhe pse shumë herët, deri në këto momente nuk raportohen dëme, megjithatë të gjitha strukturat e emergjencave civile janë në gatishmëri të plotë për të evidentuar e me pas reaguar në çdo situate.
Kujtojmë se lëkundja që u regjistrua në orën 23:43 më orën lokale (22:43 në Shqipëri) ka shkundur të gjithë vendin tonë, kryesisht Korçën që është në kufi me Greqinë. Gjithashtu është ndjerë në Tiranë, Durrësi, Fieri, Elbasan, Berat, Vlorë, Korçë e Gjirokastër.
