Në një intervistë këtë mëngjes në emisionin “Koha për t’u zgjuar” në News24, avokati Gylsen Zhllima u ndal te një praktikë e njohur gjatë fushatave zgjedhore: premtimet për leje legalizimi në këmbim të votës.
Duke pasur parasysh se zgjedhjet parlamentare të 11 majit janë afër, Zhllima bëri thirrje për kujdes, pasi sipas tij, shumë qytetarë bien pre e këtyre skemave, pa ditur se lejet që marrin gjatë fushatës mund të anulohen menjëherë pas saj.
“Ligji i vitit 2020 parashikon që, në rast se një drejtori vendore jep një leje legalizimi përmes një urdhri të paligjshëm, drejtoria e përgjithshme brenda institucionit ka të drejtën ta shfuqizojë atë. Kjo ndodh sidomos pas përfundimit të fushatës, kur kontrolli institucional rikthehet. Është një formë e zakonshme mashtrimi për të siguruar vota”, tha Zhllima.
Ai theksoi se qytetarët duhet të jenë të vetëdijshëm për rëndësinë e votës dhe përfaqësimit në Kuvend: “Pavarësisht kush fiton, mos harroni se po zgjidhni ata që do bëjnë ligjet. Zgjidhni njerëz që e njohin realitetin – mjekë, avokatë, pedagogë – sepse përfaqësojnë më mirë interesat e qytetarëve, pavarësisht forcës politike që i kandidon.”
