Ditën e sotme qindra protestues marshuan nëpër rrugët e Kabulit për të kërkuar nga Shtetet e Bashkuara të shkrijnë asetet financiare të Afganistanit.
Protestuesit brohoritën me parulla kundër Amerikës dhe u mblodhën para ambasadës së mbyllur të SHBA-së në kryeqytetin afgan, me pankarta ku shkruhej: “Na jepni paratë tona të ngrira” dhe “Le të hamë”.
Më vete, dhjetëra përfaqësues të biznesit privat afgan organizuan një demonstratë në Kabul për t’i bërë thirrje Uashingtonit të zhbllokojë rezervën valutore. Ata këmbëngulën se masa ndëshkuese e drejtuar ndaj talebanëve ka pasur “një ndikim shkatërrues” në sektorin privat “jopolitik” afgan dhe punëtorët e zakonshëm.
Organizatorët shpërndanë kopje të një letre të hapur drejtuar Sekretarit të Shtetit të SHBA-së Antony Blinken, në të cilën shkruanin se rënia e administratës afgane të mbështetur nga perëndimi la pas 600 milionë dollarë në fatura të papaguara për shërbimet e bëra në bazë të kontratave qeveritare dhe projekteve të financuara ndërkombëtarisht.
Uashingtoni ka bllokuar aksesin e Kabulit në rreth 9.4 miliardë dollarë, kryesisht të mbajtura në Rezervën Federale të SHBA-së, menjëherë pasi talebanët islamikë morën kontrollin ushtarakisht të vendit të shkatërruar nga lufta në mes të gushtit.
Ngrirja e parave dhe sanksionet ndërkombëtare e kanë sjellë ekonominë afgane, e cila varej shumë nga ndihma e jashtme gjatë 20 viteve të fundit, në prag të kolapsit. Banka Botërore dhe Fondi Monetar Ndërkombëtar kanë ndërprerë gjithashtu ndihmën financiare për projektet e zhvillimit.
Kriza ka rritur nevojat humanitare në nivele rekord në Afganistan, që rrjedhin nga vitet e luftës, thatësirës dhe varfërisë ekstreme. Kombet e Bashkuara vlerësojnë se më shumë se gjysma e popullsisë afro 40 milionëshe përballet me urinë, me 1 milionë fëmijë në rrezik të vdekjes nga “kequshqyerja e rëndë akut”./Voa
