Kreu i Kadastrës Artan Lame, i ftuar në emisionin “Koha për t’u zgjuar”, deklaroi se e njeh shumë mirë problematikën që kanë qytetarët për pronat, duke shtuar se Kadastra ka shtuar ritmin e punës.
“Është e vërtetë që qytetarët kanë vite që presin dhe thuhet sërish pse nuk po mbarohet puna. Problematika e pronës vazhdon akoma. Problemet e Kadastrës janë afatgjata, që kërkojnë muaj dhe vite. E dyta janë probleme afatshkurtra, të përditshme. Kadastra ofron 1.1 milionë shërbime në vit, janë të përditshme, ku përfshihen ata të legalizimeve e një mori problematikash.
Ne kemi bërë shumë më shumë punë se qeveria paraardhëse. Janë 3 000 shërbime pa përgjigje dhe prapë është problematikë. Kemi dalë nga një batak i jashtëzakonshëm. Kemi dhënë vjet mbi 18 mijë certifikata prone. Kemi mbi 10-fishuar ritmin”, tha fillimisht Lame.
“Deri 21 ditë ka afat për regjistrim. Afatet në tërësi respektohen. Por, në tërësi ka probleme të tjera si mbivendosja e pronës. Dokumentacioni i shumë institucione është shumë i ngatërruar. Shërbimet online, me gjithë problemet, që shumë qytetarë kanë edhe vështirësi, por llogaria personale në E-Albania është portofoli personal për çdo qytetar.
Kalimi online i shërbimeve mundësoi që shteti të mos paralizohet. Kur është parashikuar që të bëhet pallat, përfiton edhe pronari i truallit. Bëhen shpronësime për interes publik, sipas dhe vendimit të Gjykatës Kushtetuese. Ka regjistër të objekteve që nuk legalizohen dot, por pronësia njihet”, u shpreh Lame.
