Erion Veliaj nuk di të ndalet, teksa ka hapur zemrën dhe ka dhënë firmën e tij për betonimin e fushës së sportit pranë Fakultetit të Inxhinierisë. Aktualisht në këtë vend ka 8920 m2 hapësirë ku të rinjtë mund të luajnë ose të ushtrojnë aktivitete fizike, por pas firmës së Veliajt, pritet që kjo hapësirë të ‘pushtohet’ nga kullat 11-katëshe.
Lali Eri ka miratuar lejen e ardhshme duke lënë vetëm 2300 m2 sipërfaqe të gjelbërt pasi çdo gjë tjetër do të kthehet në beton, asfalt apo dhe tulla, pasi vendin do ta zaptojnë kullat e famshme të tij. Në total janë 24 mijë e 700 m2 ndërtim, teksa kati i parë do të jetë 2245 m2. Referuar projektit të ri të kullave, pas pak muajsh në vend të fushës së gjelbërit të sportit do të ‘lulëzojnë’ kullat shumëkatëshe.
Në fakt Veliaj nuk e ka për herë të parë, pasi thuajse çdo cep i kryeqytetit është i pushtuar nga ndërtesat e larta që kanë zënë hapësirat publike. Sipas projektit të siguruar nga Ora, Bashkia e Tiranës është kritikuar shpesh për zënien e hapësirave në qendër të Tiranës apo shembjen e banesave të vjetra duke ndërtuar kulla. Por tashmë kur dhe ato janë drejt fundit, Veliaj ka kthyer vështrimin drejt terreneve sportive.
