I dërguari i posaçëm i Bashkimit europian për dialogun Kosovë – Serbi, Miroslav Lajçak, tha se Kosova duhet të ndryshojë kushtetutën në mënyrë që të zbatojë marrëveshjen për Asociacionin e Komunave me shumicë serbe.
Lajçak bëri deklaratën pas takimit të tij me presidentin serb Aleksandër Vuçiç në Beograd.
Sipas përfaqësuesit të BE-së kushtetuta nuk është bibël që të mos ndryshohet.
“Është thënë qartë se ajo që është premtuar duhet të realizohet, përfshirë Asociacionin. Është e logjikshme që të ndryshojë Kushtetuta. Nuk ka thënë askush se nuk guxon të ndodh. Kushtetuta nuk është Bibël,” theksoi Lajçak.
I dërguari special thotë se gjithçka që lidhet me Asociacionin e Komunave Serbe është nënshkruar dhe se marrëveshja duhet zbatuar .
“Çështja kyçe ose parimi i tërë këtij procesi është që në fund të fundit të mos ketë çështje të hapura ose të pazgjidhura. Kemi të bëjmë me çështje që nuk kanë qenë në negociata deri më tani dhe ato që kanë qenë, por nuk janë përmbushur. Këto janë çështje të vështira që provokojnë emocione dhe çelësi është që gjithçka që është rënë dakord duhet të përmbushet” nënvizoi Lajçak.
Një ditë më parë zyrtari i lartë paralajmëroi nga Prishtina se nuk do të ketë një marrëveshje përfundimtare nëse pala e Kosoëvs nuk bën kompromis sa i përket çështjes së Asociacionit.
Presidenti serb Aleksandër Vuçiç tha pas takimit ,se gjatë bisedimeve me Lajçak insistoi për zbatimin e plotë të Marrëveshjes së Brukselit të vitit 2013.
“Ky është një kusht pa të cilin dialogu nuk mund të vazhdojë me sukses. Paqja nuk është një zgjidhje e keqe, lufta është”, u shpreh Vuçiç.
Nga ana tjetër kryeministri i Kosovës Avdullah Hoti ka deklaruar se e konsideron cështjen e Asociacionit një çështje të mbyllur.
Marrëveshja për Asociacionin e Komunave me shumicë serbe midis Kosovës dhe Serbisë u arrit në Bruksel në vitin 2013. Por ajo u rrëzua me vendimin e Gjykatës Kushtetuese të Kosovës sipas të cilës 28 pika të marrëveshjes ishin në kundërshtim me Kushtetutën e vendit.
/GazetaReforma.com/
