Teksa një pjesë e madhe e shteteve europiane po i kthehen pak nga pak normalitetit, Rusia duket të jetë ende larg.
Mediat e huaja raportojnëse se ajo regjistroi të dielën 10,600 raste të reja me koronavirus, duke regjistruar shifrën më të lartë ditore nga goditja prej epidemisë.
E megjithatë, shkalla zyrtare e vdekshmërisë është e ulët në krahasim me vendet si Italia, Spanja dhe Shtetet e Bashkuara, pasi 58 kanë humbur jetën gjatë 24 orëve të fundit, duke e çuar numrin e përgjithshëm të vdekjeve në 1,280.
Kryebashkiaku i Moskës Sergei Sobyanin ka thënë se kryeqyteti rus, i cili është shfaqur si epiqendra e virusit, nuk ka kaluar ende kulmin e shpërthimit, pasi kryeqyteti rus regjistroi 5, 948 raste të reja, duke e çuar totalin në 68, 606.
“Sipas testeve të shqyrtimit të grupeve të ndryshme të popullsisë, numri i vërtetë i të infektuarve është rreth dy përqind e popullsisë së përgjithshme të Moskës,” tha ai.
Por, pavarësisht rritjes së vazhdueshme të rasteve, qeveria ka deklaruar se gradualisht mund të heqë masat e izolimit nga 12 maji, por lehtësimi do të varet nga rajoni në rajon.
Sobyanin tha të shtunën se rreth dy përqind e banorëve të Moskës – ose më shumë se 250,000 njerëz – janë me koronavirus.
Presidenti Vladimir Putin ka urdhëruar që masat kufizuese, të quajtura ditë jo pune, të vazhdojnë deri më 11 maj.
