Deputetja e PD, Jorida Tabaku ka reaguar në lidhje me vendimin e Gjykatës Kushtetuese për të shfuqizuar një pjesë të ligjit për studentët e mjekësisë. Ky ligj i detyronte studentët e mjekësisë që që të punonin në Shqipëri për pesë vite pas mbarimit të studimeve dhe vetëm atëherë do të pajiseshin me diplomë. Tabaku e ka cilëson këtë vendim si një shans për demokracinë dhe sundimin e ligjit. Ndërkohë sipas deputetes demokrate kjo ështënjë provë që opozita është në krah të qytetarëve, duke marrë parasysh këtu se ishin edhe një grup deputetësh të opozitës që iu bashkuan studentëve për të ankimuar ligjin në Kushtetuese.
Reagimi:
Kur politika është në shërbim të qytetarëve! Një grup studentësh patën vizionin, vendosmërinë dhe besimin për ta çuar betejën e tyre në institucione. Patën besimin se së bashku me Grupin Parlamentar të Partisë Demokratike do të mund të zhbënin nismën antikushtetuese të ndërmarrë nga qeveria.
Sot, padia e dorëzuar në GJK nga palët dëshmoi vërtetësinë dhe sinqeritetin e kauzës. Dëshmoi se institucionet janë një shans për demokracinë dhe sundimin e ligjit. Shfuqizimi i detyrimit për studentët e mjekësisë të qëndrojnë në Shqipëri për 5 vite pas përfundimit të shkollës është fitorja e studentëve.
Por, njëkohësisht dhe një dëshmi se si politika mund t’i shërbejë qytetarëve. Një provë e fortë se si opozita është në shërbimin e qytetarëve jo vetëm duke denoncuar por edhe duke punuar për to.
E gjitha kjo mund të arrihet përmes institucioneve, forcës së argumentit dhe vërtetësisë së bindjeve se bashkë mund t’ia dalim.
