Disa ditë më parë trupi i shqiptarit Festim Lato u gjet i pajetë në kanalin e Amsterdam-Rhein pranë Nigtevechtit, nga një kalimtar.
Trupi i Latos mbërriti ditën e sotme në Shqipëri, pasi ai e kishte lënë amanet që kur të vdiste, trupi i tij të prehej në vendlindjen e tij.
Sipas medias “De Gelderlander”, Lato ishte kreditor për një kohë të gjatë dhe ishte deklaruar nga gjykata në Zutphen i falimentuar. Lato ishte dënuar disa herë për mashtrim, kjo pas disa denoncimeve nga shumë persona. Edhe në Kosovë madje ishte akuzuar disa herë për mashtrim për disa mijëra euro.
Sadrie Kasimi, ka folur për “Report Tv” duke bërë akuza të rënda e duke u shprehur se një holandez e ka futur atë në kurth.
Kasimi është shprehur se ajo ka bashkëpunuar për 5 vite me presidentin e vetëshpallur të Republikës came, Festim Laton.
Kasimi shpehet hapur para kamerës se ishte një bashkëpunëtor holandez i Latos që e futi atë në kurth. Ajo nuk bën të ditur emrin e tij por thotë se këto informacione i ka mësuar nga të njohur të saj në Holandë dhe vetë kryeministri i vetëshpallur i republikës çame, Ali Aliu.
“E morën, e gënjyen me metodën e tyre që do shiste makinën, dhe e morën e vranë. Ishte një djalë holandez që ka marrë pjesë në republikën e Çamërisë dhe ka ardhur 4 herë në Vlorë nga Holanda.
Festim Lato ishte me dy njerëz të tij në makinë. E ka thirrur ky djali dhe i ka thënë do vish se jam me dy njerëz do e shesësh makinën, do vish në kafe? Ai i la të gjitha në makinë, me telefona dhe ata e morën e vranë.
Veç të mira i ka bërë popullit çam. Na ka ndihmuar në çdo prizëm, na ka ardhur shumë keq, sikur më ka vdekur djali im, jo një president. Nuk e di si e mashtruan.
Të njëjtën gjë na tha edhe kryeministri i republikës Çame, Ali Aliu na e sqaroi gjendjen. Në familjen e tyre ka rënë bombë e madhe. E kemi pritur këtë vrasje sikur ka vrarë të gjithë çamët. I lutem Ministrit të Punëve të Jashtme të mos e mohojë Çamërinë.
Ne nuk do rrimë rehat tani që na bënë edhe këtë vrasje. Kush e vuri atë njeri që e vranë, dhe në fund t’i fusin thikën ashtu dhe ta lëshojnë rrugëve, është çudi e madhe”, u shpreh bashkëpunëtorja e Latos, Sadrie Kasimi.
