Kryetari i Lëvizjes Vetëvendosje, Albin Kurti, ka folur për mediat pas mbledhjes së Kuvendit dhe betimit të deputetëve të rinj.
Kurti është shprehur se sot kanë treguar një qytetërim demokratik, pasi kanë themeluar institucionet e reja dhe shpreson që të kalohen të gjitha pengesat.
“Kuvendi është tempulli i demokracisë dhe ligjvënies. Prandaj, jam i bindur që me këtë hap kemi treguar një lloj qytetërimi demokratik sepse për dallim nga legjislatura e gjashtë, ne nuk kemi bllokuar konstituimin e institucioneve.”
Ai ka folur sërish për formimin e koalicionit me LDK.
Ndryshe nga dje, Kurti u shpreh se ndodhen në kontakte të rregullta dhe me siguri që do të ketë bashkëpunim.
“Me dashamirësinë dhe me interesin e përgjithshëm para çfarëdo interesi tjetër besoj që do t’i tejkalojmë të gjitha pengesat dhe të kemi edhe qeveri të re ashtu siç patëm edhe Kuvend të ri. Ne jemi në kontakt të rregullt. Me siguri që do të kemi komunikim, bashkëpunim dhe takime”, tha Kurti.
Sot është themeluar legjislatura e 7-të e Kuvendit të Kosovës.
Vetëvendosje ka 29 deputetë në Kuvend, LDK 28, Partia Demokratike e Kosovës 24, koalicioni Aleanca për Ardhmërinë e Kosovës dhe Partia Socialdemokrate kanë 13 vende dhe koalicioni NISMA-AKR-PD ka 6 vende.
Ndërsa pakica serbe ka fituar 10 vende.
Mirëpo, Kosova vijon të mos ketë një qeveri.
Kjo sepse VV dhe LDK nuk kanë arritur ende në një marrëveshje.
LDK ka kërkuar Kryetarin e Kuvendit, Presidentin dhe 5 ministri, mirëpo këto kërkesa nuk janë pranuar nga VV.
Sot me zgjedhjen e kryeparlamentarit nga Vetëvendosja, Lëvizja Demokratike e Kosovës tha se heq dorë nga ky post, duke ofruar një marrëveshje të palëkundur për 5 ministri dhe presidencën.
