Kryeministri Edi Rama ditën e sotme ishte i ftuar në ‘Opinion’, ku ka folur rreth planit financiar, por edhe për situatën aktuale në vendin tonë.
Ndër masat e shumta që ka marrë Italia është ‘falja’ për 3 muaj e faturave të dritave dhe nisur nga kjo qytetarët shqiptarë kanë nisur të mendojnë diçka të tillë edhe për vendin tonë.
Mirëpo, kryeministri Rama nuk është i këtij mendimi, pasi i pyetur nga Blendi Fevziu rreth një mase të tillë, përgjigja e tij ishte e shkurtër dhe e prerë: “Kurrë!”.
Më tej, Rama është shprehur se ka kërkuar ndihmë nga Turqia nëse vendet e tjera nuk do ta ndihmojnë Shqipërinë në përballimin e Coronavirusit, ndërsa Ministria e Shëndetësisë ka kërkuar edhe ekspertë dhe ndihma nga Kina.
“Ministria e Shëndetësisë ka bërë me marzhin e vetë. Para se të vija këtu kam folur me presidentin e Turqisë më të cilin kam komunikim të vazhdueshëm, kjo nuk është sekret. Kemi prej 2 javësh që kemi vendosur në tavolinën e shtetit turk alternative. Një listë me kërkesa, në rast se përmbyset bota dhe s’ka mundësi komunikimi me askënd. Atë pjesën kritike, atë gjënë që duhet ta kemi të garantuar, për një plan C, e kemi të garantuar dhe me Turqinë,” -tha Rama.
Po ashtu, Rama tha se ka disa aktivitete ekonomike që nuk mund të ndërpriten pasi kjo do e dëmtonte rëndë ekonominë.
“Nëse aktiviteti është i hapur dhe nuk shkojnë në punë, nuk do t’i paguajë askush. As Italia nuk e ka mbyllur zinxhirin ekonomik. Se kthehen njerëzit në gjendjen natyrale dhe hanë njëri-tjetrin,”-tha Rama.
Ndër të tjera, kreu i qeverisë është shpehur se nga dita e nesërme shërbimi i internetit mund të jetë falas për të gjithë dhe se Autoriteti i Komunikimeve Elektronike dhe Postare po merret me këtë çështje.
“Po merremi intensivisht, AKEP është në punë intensive dhe shpresoj që të kemi një përgjigje nesër. Në disa vende ka kolapsuar sistemi dhe besoj që nesër do kemi një lajm të mirë”, tha Rama.
Virusi që lindi në Kinë në fund të 2019, ka shkaktuar deri tani rreth 10, 000 viktima dhe ka infektuar mbi 241,000 persona në 177 shtete.
OBSH ka shpallur pandeminë, teksa epiqendra e virusit tashmë është zhvendosur në Europë, në një kohë kur Kina po rimerr veten dita-ditës dhe madje po ndihmon shtetet e tjera të prekura.
Qeveria shqiptare ka ndërmarrë një sërë masash për të parandaluar përhapjen e Coronavirusit, teksa është kufizuar qarkullimi i makinave dhe i këmbësorëve.
Gjithashtu ka nisur aplikimi i gjobave për ata që nuk respektojnë rregullat e vetëkarantinimit, kompanitë që nuk marrin masat ndaj Coronavirusit dhe tregtarët që rrisin çmimet në mënyrë abuzive.
