Në Bulgarec të Korçës, vendimi i qeverisë për sekuestrimin e mallrave që shiten pa kupon tatimor po shkakton pasiguri dhe revoltë mes shitësve ambulantë.
Një prej tyre është Alfred Limoni, një burrë që prej 25 vitesh shkon çdo mëngjes në Korçë me biçikletën e tij të vjetër, duke mbajtur në kosh disa bidona qumështi që i ka nga lopët e tij.
“Këta pesë bidona janë buka jonë e përditshme. Kam tre lopë, njëra është drejt tharjes. Me zor mbaj familjen, mezi dalim me 10 mijë lekë në ditë”, thotë Alfredi, duke theksuar se e ka të pamundur të kuptojë sesi mund të kërkohet kupon tatimor për një aktivitet kaq të vogël jetese.
Prej pak ditësh, fushatat e kontrollit tatimor kanë përfshirë edhe shitësit e rrugës, përfshirë ata që tregtojnë produkte të prodhuara në fermat familjare.
Kryeministri Edi Rama ka kërkuar që të gjithë shitjet të jenë të dokumentuara, por për fermerë si Alfredi, kjo kërkesë është e pakuptueshme dhe jashtë realitetit.
“Le të më kontrollojnë cilësinë e qumështit, të më pyesin për lopët, jo të më pengojnë tregtinë. Klientët e mi nuk marrin qumësht tjetër. Unë nuk e di çfarë është kuponi. As nuk më ka kërkuar njeri ndonjëherë. Po do shteti të marrë të vetën? Le të më pajisë vetë, unë nuk kam ide çfarë kërkohet”, shprehet ai.
Për shumë fermerë e shitës ambulantë, vendime të tilla tregojnë një shkëputje të thellë midis realitetit të qytetit dhe jetës në fshat.
Ligji për kuponin tatimor, ndonëse i drejtuar ndaj informalitetit, po godet edhe ata që punojnë ndershmërisht për të mbijetuar me atë pak që prodhojnë vetë.
