Tregtarët e Bashkisë së Belshit kanë dalë në protestë ditën e sotme kundër vendimit të Këshillit Bashkiak për heqjen e tregut nga qyteti. Protesta nisi e qetë derisa tregtarët kanë hyrë me forcë në ambientet e institucionit dhe kanë kërkuar një takim me kryebashkiakun.
Por teksa tentonin të futeshin në godinë, Policia Bashkiake ka mbyllur derën dhe i ka penguar që tregtarët të marrin informacion, megjithatë këta të fundit ia kanë dalë që të hapin derën kryesore me forcë.
“Ky është kryetari. Duhet që një përfaqësuesi i juaji të vijë dhe të zgjidhë hallet me ne, jemi taksapagues të këtij shteti. Kemi një muaj pa punë. Është ora 11.15, na e thoni kur e ka orarin? Si nuk dilka një person? Ju e bëni bashkërisht çdo gjë. Kryetari na tha ditën e hënë do iu presim. Na ka lënë një muaj pa punë. Ke të drejtë të na respektosh, o zotëri të lutem shumë, na thuaj ku është kryetari? A ka punonjës bashkia? Ky është një institucion që s’ka kryetar,” i janë drejtuar tregtarët, policisë bashkiake në Belsh. Por si përgjigje nga kreu i Policisë Bashkiake në Belsh kanë marrë vetëm shtyrjen e datës.
“Kryetari nuk është sot, hajdeni nesër prapë,”– u tha ai tregtarëve.
