Ngjarja tragjike pranë shkollës “Fan Noli”, ku humbi jetën 14-vjeçari Martin Cani, nxjerr në pah dështimin e institucioneve përgjegjëse për të garantuar sigurinë e nxënësve.
Një konflikt mes bashkëmoshatarëve, i nisur disa ditë më parë, kulmoi në një tragjedi, ndërsa ministria e Arsimit duket se ka zgjedhur heshtjen dhe burokracinë në vend të veprimit të menjëhershëm.
Edhe pas tetë ditësh nga ngjarja, Ministria e Arsimit deklaron për TCH se është ende në proces verifikimi dhe nuk ka identifikuar përgjegjësit. Ndërkohë, dëshmitë flasin për një paralajmërim të hapur në klasë.
Autori i ngjarjes kishte deklaruar qartë para të gjithëve se çfarë do të ndodhte, madje duke treguar edhe madhësinë e thikës që do të përdorte. Përkundër këtyre paralajmërimeve, askush nuk ndërhyri për të parandaluar tragjedinë.
Ministrja e Arsimit, Ogerta Manastirliu në vend që të ndërmerren hapa konkrete, është mjaftuar me premtime për hetime që, siç tregon përvoja, rrallëherë çojnë në rezultate.
Pas humbjes së jetës së Martin Canit, zëri i institucioneve përgjegjëse mbetet i dobët dhe i pasigurt. Ministria e Arsimit duket se ka adoptuar një qasje reaguese, në vend që të marrë masa parandaluese. Mungesa e mbështetjes për oficerët e sigurisë, presioni ndaj tyre dhe trajtimi i ngjarjeve si incidente të izoluara vetëm sa e përkeqësojnë situatën.
Dhimbja e familjes Cani është e madhe, por më e rëndë është fakti që ky rast ka të ngjarë të përsëritet.
