Sulmet kibernetike janë më të rrezikshmit sot për sot dhe një bankë në Maltë ka arritur që ta përballojë një të tillë. Bëhet fjalë për bankën më të madhe të këtij shteti, “Bank of Velletta”, prej nga është tentuar që të merren plotë 13 milionë euro.
Kjo shifër është bërë publike nga vet kryeministri, Joseph Muscat, i cili tha se këtë herë arritën të shpëtonin, ama kujdesi duhet të jetë shumëfish më i madh në rast se ka një tentativë të dytë.
Kjo bankë është institucion, ku qeveria është aksionari më i madh, dhe kur u vu re se hakerat po përpiqeshin të përvetësonin para prej tyre, janë bllokuar të gjitha kodet e sigurisë së sistemeve duke mbyllur degët dhe bankomatët , si dhe duke ndërprerë transaksionet bankare nga smartfonët dhe email-et e brendshme. Gjithashtu edhe faqja web e saj ka dalë jashtë shërbimit, pra ndodhi një bllokim total i çdo aktiviteti, i cili vazhdon ende.
Banka njoftoi se llogaritë e klientëve nuk janë rrezikuar apo prekur në asnjë mënyrë dhe shërbimet do t’i kthehen normalitetit sa më shpejt të jetë e mundur, transmeton Atsh.
”Hakerët janë përpjekur të transferojnë fonde në disa banka në Republikën Çeke, në Hong Kong në Britaninë e Madhe dhe SHBA”, sqaroi Muscat në Parlament.
