Aq milje detare sa i duhen për t’u zgjeruar në një zonë ekonomike pranë kufirit ujor me Shqipërinë, Greqia mund të na i marrë nëse çështja do të shkojë në një gjykatë ndërkombëtare.
Të këtij mendimi janë përfaqësues të ndryshëm të shoqërisë civile në vend, të cilët sot janë mbledhur për ta analizuar dhe për të dalë me një qëndrim të përbashkët, në lidhje me çështjen e dhënies ose jo të 12 miljeve detare Greqisë.
Aktorët e shoqërisë civile janë mbledhur sot në Tiranë pas vendimit që qeveria shqiptare mori në lidhje çështjen e kufirit detar me Greqinë, dhe kanë vendosur që t’i dorëzojë Presidentit, Parlamentit dhe Kryeministrit një kërkesë për referendum.
Gjatë konferencës në Tiranë, të moderuar nga ambientalisti, Sazan Guri, ekspertë të fushës u shprehën se, Shqipëria nuk është e përgatitur për t’u përballur me Greqinë në Gjykatën e Strasburgut.
Sipas specialistëve të fushës dhe ish-drejtues të Forcës Detare, në negociatat me Greqinë, është lënë në harresë kujtesa historike.
Sipas profesor Sazan Gurit, “ky grup do të prodhojmë një nivel rezolute për t’iu drejtuar më pas Presidentit, Kryeministrit, Kuvendit, opozitës dhe vetë popullit, për mundësinë e të shprehurit për këtë çështje me referendum specifik, vota e të cilit do të quhet votë sovrani, për aq kohë sa asnjë nga klasa politike nuk ka këllqe ose janë shumë të vegjël, për të mbajtur përgjegjësi kaq të mëdha.
Kemi kërkuar bashkëpunime të ndryshme me Akademinë e Shkencave por ajo vuan të njëjtën sëmundje bunkerizuese si shteti. Kemi bërë kontakte me gjithë spektrin teknik që nga kuadri juridik, deri te ai topografik, duke përfshirë brenda historikun.
Konstatojmë se palët janë goxha të interesuara për të arritur një konkluzion, që ne të mos nxitohemi për të shkuar në Hagë, sepse jemi të papërgatitur. Ky grup ka aftësi teknike dhe profesionale të pafundme që mund të krijojnë një grup kaq serioz sa mund të debatojë me palën greke në mënyrë shkencore dhe historike”.
Më tej, Prof. Guri ka thënë se, “një nga dështimet më të mëdha që të dy qeveritë tona dështuan në përcaktimin e një marrëveshje të saktë me Greqinë, për mua ka qenë mosrespektimi i memories shtetërore. Çdo gjë ka filluar pas ’90-ës, nuk është kështu, shteti ka funksionuar. Më mohoet e drejta për të parë hartat e mia”.
/GazetaReforma.com/
