Kuba u bë të hënën vendi i parë në botë që filloi vaksinimin ndaj Covid-19 për fëmijët nga mosha dy vjeç, duke përdorur vaksina që i ka prodhuar vetë, ende të pamiratuara nga Organizata Botërore e Shëndetit.
Ishulli komunist me 11.2 milion njerëz synon të vaksinojë të gjithë fëmijët e tij para se të rihapë shkollat që janë mbyllur në pjesën më të madhe që nga marsi i vitit 2020. Viti i ri shkollor filloi të hënën, por nga shtëpia përmes programeve televizive, pasi shumica e shtëpive kubane nuk kanë qasje në internet.
Pasi përfundoi provat klinike mbi të miturit me vaksinat e saj Abdala dhe Soberana, Kuba nisi fushatën e saj të vaksinimit për fëmijët të premten, duke filluar me ata 12 vjeç e lart.Të hënën, filloi shpërndarjen e dozave në grupmoshën 2-11 vjeç në provincën qendrore të Cienfuegos.
Disa vende të tjera në botë po vaksinojnë fëmijë nga mosha 12 vjeç, dhe disa po kryejnë prova tek fëmijët më të vegjël. Vende të tilla si Kina, Emiratet e Bashkuara Arabe dhe Venezuela kanë njoftuar se planifikojnë të vaksinojnë fëmijët më të vegjël, por Kuba është e para që e ka bërë këtë.
Vaksinat kubane, të parat e zhvilluara në Amerikën Latine, nuk i janë nënshtruar vlerësimit ndërkombëtar shkencor nga kolegët. Ato bazohen në teknologjinë e proteinave rekombinante – e njëjta e përdorur nga Novavax i Shteteve të Bashkuara dhe vaksinat Sanofi të Francës që gjithashtu presin miratimin e OBSH -së. Ndryshe nga shumë injeksione të tjera në përdorim, vaksinat rekombinante nuk kërkojnë kushte ekstreme frigoriferike.
Kuba ka parë një shpërthim në infeksionet koronavirus muajt e fundit, gjë që ka sjellë vështirësi në sistemin shëndetësor. Nga 5,700 vdekje të regjistruara nga koronavirusi që nga fillimi i pandemisë, gati gjysma ishin vetëm në muajin e fundit, siç ishin pothuajse një e treta e të gjitha rasteve të raportuara.
