Tërmeti i nëntorit të 2019 la pasoja të rënda në dëmtimin e shtëpive dhe apartamenteve.
Dy vite pas tërmetit, pritet t’iu shpërndahen bashkive në vend rreth 6 miliard lekë grante të tjera rikonstruksion.
Kërkesa për fondet e rindërtimit në programin e granteve të rikonstruksionit për bashkitë Tiranë, Durrës, Rrogozhinë, Shijak, Mirditë dhe Kurbin e miratuar nga Komisioni Shtetëror i Rindërtimit është propozuar për miratim Këshillit të Ministrave.
Programi për dhënien e granteve të rikonstruksionit parashikon që punimet për dëmtime të klasifikuara, si: DS1, DS2, DS3, të mund të kryhen vetë nga qytetarët me rimbursim shteti.
Për kryeqytetin, Komisioni i Rindërtimit ka miratuar financimin e fondit “grante për rikonstruksionin” me vlerë 3,5 mld lekë për ndërtime të klasifikuara me dëmtime DS1-DS3 dhe DS4, ndërsa për Durrësin 1,7 mld lekë, për Rrogozhinën 624 mln lekë, për Shijakun 158 mln lekë, për Kurbinin 28 mln lekë dhe për Mirditën rreth 6 mln lekë.
Sipas vendimit të Komisionit të Rindërtimit pjesa më e madhe e fondit për Tiranën me vlerë rreth 1,1 mld lekë do të përdoret për kryerjen e punimeve për riforcimin e 22 njësive të banimit në pallat të cilat janë klasifikuar si objekte me dëmtime të mëdha strukturore me shkallë dëmtueshmërie DS4 dhe që nuk duhen rindërtuar nga e para dhe 1,8 mld lekë për rindërtimin nga e para për njësi individuale të banimit, shkruan Monitor.
Ndërsa fondi me vlerë 240 mln lekë do të përdoret për rikonstruksionin e 272 apartamenteve të klasifikuara me dëmtime DS1-DS3. Në Durrës 1,1 mld lekë do të financojnë kryerjen e punimeve për forcimin e 18 njësive të banimit në pallat dhe 473 mln lekë për kryerjen e punimeve për riforcimin e 68 shtëpive individuale.
Në 2020 totali i fondit të miratuar për t’u shpërndarë nëpërmjet granteve të rikonstruksionit ishte 9,8 mld lekë për 11 bashki të vendit.
Kujtojmë që procesi i shpërndarjes të granteve të rikonstruksionit në 2020 u zhvilluan nëpërmjet aplikimeve në platformën online të banorëve, shtëpitë e të cilëve u dëmtuan nga tërmeti.
Ndërkaq një vit më vonë vjen një kërkesë nga bashkitë për një fond prej 6 milardë lekësh në funksion të rindërtimit, në një kohë që rezultatet e fondeve që kanë marrë më përpara nuk janë edhe aq evidente.
Përtej kësaj, kërkesa për fond krijon hapësira për të menduar se si janë menaxhuar fondet e rindërtimit më përpara dhe ku janë adresuar.
