Presidenti Ilir Meta ktheu ditën e sotme në Kuvend ligjin mbi kufizimet që u vendosën ndaj medias gjatë periudhës së pandemisë. Sipas kreut të shtetit këto kufizime, si numri i kufizuar i të ftuarve në emisione televizive dhe ruajtja e distancës fizike janë të drejta, por gjoba që vendoset ndaj thyerjes së tyre është ndëshkuese dhe shporporcionale.
Me anë të një postimi në Facebook, pas publikimit të vendimit të tij për të kthyer për rishqyrtim në Kuvend këtë ligj Meta shkruan se përkrah masat objektive që ndihmojnë në tejkalimin e pandemisë por që nuk do të dekretojë asnjë rregull të ri i cili cënon lirinë dhe privatësinë e medias.
Postimi i plotë
“Përkrah masat kufizuese objektive që ndihmojnë në përballimin dhe tejkalimin sa më parë të pasojave të pandemisë COVID-19.
Por nuk do të dekretoj asnjë rregull të ri, që në shpërdorim të procesit legjislativ dhe përmes masave ndëshkuese shproporcionale, cenon liritë dhe të drejtat kushtetuese të njeriut, veçanërisht lirinë dhe pavarësinë e medias.”
