Kryetari i Lidhjes Demokratike të Kosovës, Lumir Abdixhiku ka foluar për mediat pas zgjedhjes së emrave të kryesisë së re të LDK. Gjatë deklaratës së tij Abdixhiku ka thënë se LDK-ja do të vazhdojë negociatat vetëm me Vjosa Osmanin si kandidate për presidente, ndërsa ka shtuar se presidenti duhet të përfaqësojë të gjithë partitë politike dhe jo vetëm një. Abdixhiku ka thënë se detajet do të bëhen publike kur të ndodhë takimi.
“Mbështetet iniciativa që LDK-ja të vazhdojë negociatat vetëm me zonjën Osmani si kandidate për presidente. Po pres që gjatë javës së ardhshme, zonja Osmani të caktojë ditën dhe datën e takimit. Na duhet president që i përfaqëson të gjitha partitë politike dhe jo vetëm një parti. Na duhet një president Kushtetues. Të gjitha detajet do t’i shpalosim kurdo që do të ndodh takimi. Ajo çfarë po themi vazhdimisht është që jemi të interesuar ti shmangim krizat”, tha Abdixhiku.
Më tej ai ka konfirmuar edhe emrat e kryesisë dhe nënkryetarëve që u zgjodhën ditën e sotme.
“ Sot kemi zgjedhur kryesinë e LDK’së në përbërje 33 anëtarësh. Kemi zgjedhur edhe nënkryetarët, Hazirin, Muhaxherin, Qunin, Shqipe Mjekiqin, e sekretarin Imri Ahmeti. Pas kësaj kemi vazhduar me mbledhjen e kryesisë së re”, ka thënë Abdixhiku..
