Pas më shumë se 13 vjetësh Serbia ka aktivizuar dy brigadat që kryen krime lufte në Kosovë dhe Bosnje Hercegovinë.
Bëhet fjalë pikërisht për brigadën 63 të parashutistëve dhe brigadën 72 të operacioneve speciale.
Lajmi është konfirmuar edhe nga ministri serb i Mbrojtjes, Aleksandër Vulin.
Brigadat ishin shkrirë në 2006-ën, por Vulin tha se kanë qenë gjithmonë me popullin serb.
“Vetëm një popull mosmirënjohës dhe vetëm një ushtri jo çlirimtare, që komandohet nga të huajt, do të vendoste të humbë emrat Brigadës së lavdishme 72 dhe asaj 63, dhe t’i hedhë në të kaluarën”, ka thënë Vulin.
Jovan Kollariç, i cili është hulumtues i Fondit për të Drejtën Humanitare, tha se dy brigadat mbahen mend për rrethimin e Sarajevës në dhjetor të vitit 1993 dhe operacionin “Reka”, më 27 prill të 1999-ës në perëndim të Gjakovës, ku u dëbua popullsia shqiptare.
Gjatë operacionit “Reka”, u vranë 350 civilë shqiptarë dhe u dëbua pothuajse e gjithë popullsia.
Trupat e të paktën 309 vitkimave të kësaj masakre, janë gjetur në varrezat masive në Bajtanicë, në periferi tëBeogradit.
Operacioni është dokumentuar edhe në Gjykatën e Hagës, ku u dhanë dënimet për disa ish-zyrtarë dhe ushtarakë serb.
Këto brigada janë dekoruar me Urdhërin e Heroit të Popullit dhe Urdhërin e Flamurit, nga Sllobodan Milloshevic.
