Njerëzit duhet të mësohen me një realitet të ri, pasi situata pas koronavirusit nuk do të jetë si para këtij virusi, tha kryeministri Rama mbrëmjen e sotme.
Në një intervistë për “Real Story”, kreu i qeverisë tha se nëse nuk përshtatemi me mënyrën e re të jetesës, atëherë mund të përballemi me pasoja të tmerrshme, teksa paralajmëroi rikthimin e masave nëse rritet numri i të infektuarve.
“Ne duhet të na bëhet e zakonshme të sillemi në mënyrë të jashtëzakonshme, të mësohemi me një sërë ritualesh të reja, sepse në të kundërt do të duhet të përballemi me pasoja të tmerrshme. Do të jetë një realitet i ri, i ndryshëm nga ai që kishim. Nëse do të ketë sërish numër të lartë infektimesh, do duhet të kthehemi mpbrapsht. Gjithçka në këtë situatë është relative dhe përtej asaj që duket ka mundësira të ndryshme për të parë. Gjërat mund të marrin rrjedha të ndryshme, në varësi se si do të sillen njerëzit. Do të kemi virusin mes nesh dhe nuk do të kemi normalitet, por do të hyjmë në një fazë, ku do të kemi një lloj normaliteti të ri me një numër të caktuar kufizimesh”, u shpreh kryeministri.
Më tej, Rama ka zbuluar detaje nga një bisedë që kanë pasur eksperët shqiptarë me ata gjermanë ku ka qenë dhe vetë dëgjues lidhur me strategjinë e ndjekur për mos përhapur COVID-19.
Sipas tij, ekspertët gjermanë nuk kanë vënë re asnjë ndryshim në menaxhimin e pandemisë në Shqipëri dhe se sistemi i testimeve bazohet fillimisht tek simptomat edhe në Gjermani dhe më pas tek kontaktet e afërta dhe gjurmimi.
“Kemi pasur një kontakt me ISHP në Gjermani, mora pjesë edhe unë për ta ndjekur, për të mësuar dhe kuptuar. Mund t’ju them që ata s’kanë parë asnjë diferencë mes strategjisë së tyre dhe tonës. Sistemi i testimeve bazohet tek simptomat dhe kontaktet. Të njëjtën gjë bën stafi ynë në drejtimin e ekspertëve, duke nisur tek simptomatikët dhe për të gjurmuar klasterat. Ajo që ne nuk kemi pasur është infektimi komunitar. Pra zinxhir nga të 4 anët në komunitet. Kemi pasur vetëm familjare dhe në punë. Kjo do varret shumë jo nga testet por nga njerëzit.” – tha Rama.
https://www.facebook.com/edirama.al/videos/2575834836077252/
