Ndërsa kryeministri Edi Rama vijon të flasë për transformimin digjital të arsimit, një procedurë e fundit nxjerr në pah një kontrast të fortë me realitetin në terren. Qendra e Shërbimeve Arsimore ka shpallur një ankand për të marrë me qira 133 kompjuterë për zhvillimin e testimeve ndërkombëtare të nxënësve, duke ngritur pikëpyetje serioze mbi infrastrukturën reale në arsimin parauniversitar.
Procedura është publikuar më 10 prill 2026 dhe synon sigurimin e pajisjeve bazë për testime, në një kohë kur prej më shumë se një dekade qeveria ka promovuar dixhitalizimin e shkollave dhe modernizimin e sistemit arsimor. Kur erdhi në pushtet 13 vjet më parë, Rama premtoi se do ta nxirrte arsimin nga prapambetja dhe do ta afronte me standardet e vendeve të Bashkimit Europian.
Në këtë kuadër, gjatë viteve 2014-2019 u akorduan rreth 35 milionë euro për ngritjen e klasave digjitale në disa qytete të vendit. Projekti u paraqit si një nga shtyllat kryesore të reformës në arsim, me fokus teknologjinë dhe mësimdhënien moderne.
Megjithatë, zhvillimet në vite kanë treguar një panoramë më problematike. Janë raportuar raste të zhdukjes së pajisjeve teknologjike nga shkollat, ndërsa rezultatet e testimeve ndërkombëtare kanë evidentuar mangësi të theksuara në cilësinë e të nxënit dhe performancën e nxënësve.
Kërkesa për të marrë me qira kompjuterë nga privatët për testime ndërkombëtare shihet si një tregues i drejtpërdrejtë i mungesës së kapaciteteve bazë. Vetë institucioni që organizon dhe mbikëqyr këto testime rezulton të mos ketë në dispozicion pajisjet minimale për zhvillimin e tyre.
Ky zhvillim vë në diskutim efektivitetin e investimeve të deritanishme dhe ngre dyshime mbi përputhjen mes deklaratave publike dhe situatës reale në shkolla. Në një sistem që është prezantuar si “digjital”, nevoja për të marrë me qira kompjuterë për testime mbetet një tregues domethënës i sfidave që vazhdon të përballet arsimi parauniversitar në Shqipëri.
