Të gjithë jemi në pritje të fillimit të sezonit të ri futbollistik nga ana e klubeve të Superiores pasi ka kaluar më shumë se një muaj dhe futbollistët nuk kanë zbritur ende në fushë.
Liga Profesioniste e Futbollit në bashkëpunim me krerët e klubeve të Superiores kanë vendosur të bojkotojnë këtë sezon pasi duan që qeveria të plotësojë katër kërkesat e tyre.
Duket se takimi i djeshëm mes kreut të Federatës Shqiptare të Futbollit Armando Duka dhe kryeministrit Edi Rama është shpresëdhënës për futbollin në vendin tonë.
Pas takimit, Duka është shprehur se kryeminsitri i ka marrë në konsdieratë kërkesat e Ligës Profesioniste dhe Ministrisë së Financave e më pas është konsultuar dhe me stafin e tij, por ende nuk kemi datë fikse se kur do të fillojnë ndeshjet.
“Kryeministri më ka premtuar se do të marrë në konsideratë propozimin tonë. Personalisht do të doja që futbolli të mos ishte ndërprerë, tani varet nga Liga nëse do të bindet”, tha Duka.
Mbetet për t’u parë se cili ka qenë përfundimi i këtij takimi, ndërkohë sot është planifikuar të mbahet edhe mbledhja e tretë mes Ligës dhe Ministrisë së Ekonomisë, nga ku priten gjithashtu lajme të mira. Pozitiv është fakti se ka patur frymë bashkëpunimi dhe pas këtyre zhvillimeve pritet të kemi sinjalin e shumëpritur të nisjes së Kategorisë Superiore.
