Fushata elektorale në Shqipëri, vazhdon të jetë më e nxehtë se kurrë. Pas shumë ngacmimeve mes Lulzim Bashës dhe Edi Ramës, dy krerët e partive më të mëdha në vend, ka qenë radha e LSI-së që të dalë kundër kryeministrit të vendit.
Kryetarja e LSI-së, Monika Kryemadhi, thotë se më datë 25 prill, qytetarët e Shqipërisë do të zgjedhin rrëzimin e fasadave. Teksa ka publikuar një video në rrjetin social “Facebook”, Kryemadhi shprehet se qytetarët vuajnë pasojat e ekonomisë së dobët familjare.
“Në Peqinin me shumë halle, Rilindja ka sjellë propagandë dhe jo prosperitet. Harxhimet për postera si tentativë që t’i hedhin hi syve qytetarëve, do të kishin lehtësuar dhimbjet e shumë familjeve në qarkun e Elbasanit, të cilat vuajnë pasojat e ekonomisë së dobët familjare.
Më datën 25 prill, qytetarët e Shqipërisë do të zgjedhin rrëzimin e fasadave”, shkruan kryetarja e LSI. Monika Kryemadhi bën thirrje që në 25 prill qytetarët të votojnë LSI-në. “Në 25 prill Shqipëria voton nr. 6 LSI, për një qeverisje që kujdeset për secilin banor të vendit, shtëpisë së madhe të gjithë shqiptarëve”.
Përvçse konsideroi rilindjen si propagandë dhe jo prosperitet, Kryemadhi ftoi edhe qytetarët shqiptarë që të votojnë numrin 6 në fletën e votimit, që përkon pikërisht me partinë Lëvizja Socialiste për Integrim.
