Deputetja e Partisë së Lirisë, Monika Kryemadhi, në një dalje për media nga hyrja e Parlamentit, shprehet plotësisht në linjë me qëndrimet e bashkëshortit të saj, Ilir Meta, rreth Prokurorisë së Posaçme. Ajo thekson se është “shumë dakord për mënyrën” që Meta ka kritikuar përdorimin e drejtësisë nga qeveria, duke shtuar se SPAK-u është “një vegël e Edi Ramës” dhe problemi i tyre “nuk është me SPAK-un”. Kryemadhi argumenton se është e papranueshme që lajmet e rëndësishme të bëhen publike nëpërmjet mediave të afërta me qeverinë para se të bëhen të ditura për publikun, duke përmendur: “Iu duket normale që gazetat e Erion Velisë hapin faqet e para në 7 të mëngjesit me njoftime që SPAK-u çon te të tjerët?”
Nga ana tjetër, Kryemadhi adreson çështjen e nepotizmit brenda partisë, një pikë ku ajo dhe Meta ndahen në mendime. Ajo përmend se, ndryshe nga kritikat për nepotizëm, meritokracia në një parti politike nuk cenohet nga nepotizmi, pasi “deputeti zgjidhet me vota”. Ajo thekson se mundësia për të qenë deputet “mund të të emërojë Ilir Meta, por problemi është se të zgjedhin njerëzit me vota.”
Për fund, kur u pyet nëse është ndjerë e sulmuar nga Ilir Meta, Kryemadhi u shpreh që sulmet më të mëdha i ka marrë nga kundërshtarët politikë si Edi Rama dhe Erion Veliaj, dhe jo nga bashkëshorti i saj. Ajo u shpreh me një ton të theksuar emocional: “Më shumë se më ka sulmuar Edi Rama dhe Erion Veliaj, pse nuk u dhimbset kjo ju! Nuk më ka sulmuar si bashkëshort, por si politikane.”
Kujtojmë se sulmet e Ilir Metës për SPAK erdhën pas intesifikimit të hetimeve nga Prokuroria e Posaçme në lidhje me ‘Çez Dia’. Mos ndoshta kreu i PL e ndieu veten të kërcënuar nga këto hetime dhe filloi fushatën e akuzave?
