Kryebashkiaku i Devollit, Eduard Duro, është paraqitur sot në Prokurorinë e Posaçme (SPAK), pas akuzave për shpërdorim detyre në lidhje me licencimin e një objekti të ndërtuar pa leje.
Pak ditë më parë, Duro u mor i pandehur nga SPAK për këtë çështje, që ka të bëjë me një leje për aktivitet karburanti në territorin e bashkisë që ai drejton.
Para mediave, Duro deklaroi se do të flasë një herë të dytë, duke nënkuptuar se nuk ka dhënë ende një deklaratë të plotë.
Në dëshminë e tij të mëparshme, ai ka theksuar se ka vepruar në përputhje me ligjin dhe se çdo dokument është firmosur sipas procedurave zyrtare. Sipas tij, leja për subjektin “Genci Petrol” është dhënë nga sektori i tatim-taksave, dhe ai e konsideron këtë si një detyrë të kryer në kushtet e përgjegjësive të tij si kryetar bashkie, jo si shpërdorim detyre.
Padia është ngritur nga shtetasit J.K. dhe M.K., të cilët pretendojnë se subjekti “Genci Petrol” nuk duhej të kishte marrë dokumentin përkatës nga bashkia.
