Një incident i rëndë ka ndodhur në afërsi të Kalasë së Krujës, ku një roje parkingu është plagosur rëndë pasi është tërhequr zvarrë nga një makinë me turistë që dyshohet se po largoheshin pa paguar.
Ngjarja nisi pas një përplasjeje verbale mes rojes së parkingut, Bujar Dedja, dhe një çifti turistësh të huaj. Sipas informacioneve paraprake, turistët janë përfshirë fillimisht në një debat me rojen, e më pas kanë tentuar të largohen pa kryer pagesën për parkimin.
Në përpjekje për t’i ndalur, Dedja është varur në kofanon e automjetit, por kjo nuk i ka ndalur turistët, të cilët e kanë tërhequr atë me vete për disa dhjetëra metra. Roja ka rënë më pas në rrugë, duke pësuar dëmtime të rënda në kokë.
Turistët janë larguar nga vendi i ngjarjes dhe identiteti i tyre ende nuk është zbardhur. Policia ka ndaluar një automjet në qytetin e Fushë-Krujës me turistë me origjinë turke, por lidhja e tyre me ngjarjen mbetet ende e paqartë. Aktualisht po verifikohen pamjet e kamerave të sigurisë në zonë për të ndihmuar hetimet.
I plagosuri, Bujar Dedja, është transportuar me urgjencë në Spitalin e Traumës në Tiranë, ku ndodhet në gjendje të rëndë shëndetësore dhe nuk është në gjendje të japë dëshmi për ngjarjen.
