COVID-19 ndër të tjera ka shkaktuar një ngërç në ekonomitë e të gjitha vendeve të prekura, duke bërë që shtete të ndryshme të ndërmarrin masa të ndryshme.
Disa ditë më parë, kryeministri Rama bëri të ditura masat ekonomike të ndërmarra për të parandaluar një krizë ekonomike, duke u shprehur madje se kishte reduktuar disa konçesione në mënyrë që paratë t’i kanalizonte në drejtimet ku ka dhe do të ketë nevoja imediate.
Ky plan financiar përbëhet prej 7 pikash dhe qeveria ka parashikuar një fond prej 370 milionë dollarësh.
Së fundmi, Rama ka realizuar një video live në Facebook, ku foli rreth çeljes së negociatave të Shqipërisë me Bashkimin Europian dhe ndër të tjera ka folur edhe rreth gjendjes aktuale në vendin tonë.
Kryeministri Rama ka deklaruar se do të ketë ndihma financiare mujore për biznesin e vogël dhe familjet me ndihmë ekonomikë gjatë periudhës së karantinës, si pasojë e situatës së krijuar nga Coronavirusi.
Po ashtu, Rama tha se do të paguajë dyfishin e pagave të deklaruara nga biznesi i vogël, për punonjësit e tij, pasi sipas zakonit, ka të vetëpunësuar që nuk deklarojnë rrogë, si edhe theksoi se nuk do të mjaftohen me aritmetikën e numrit të të vetëpunësuarit dhe se do të shkojmë përtej këtij numri.
“Sot kam dhënë miratimin për dhënien e pagesës mujore për ata që e kanë edhe hallin më të madh, të punësuar apo vetëpunësuar, familje që jetojnë me ndihmë ekonomike, apo të papunë. Shuma e pagave mujore të deklaruara është 731 milionë lekë të reja nga biznesi i vogël. Por shpesh herë paga e vetme e deklaruar është ajo e kryefamiljarit në kufijtë e pagës minimale, rruga e shkurtër do të ishte, dakord po i japim kryefamiljarit pagën e deklaruar nga ai vetë dhe jemi në rregull me regjistrin e pagave të deklaruara nga biznesi i vogël, 710 mln lekë. Por ka një shprehje të bukur populli, i takon me ligj dhe me zakon, e dimë se ka shumë familje të vetëpunësuara, ku kryefamiljari deklaron pagën e tij, por gruan e deklaron të punësuar pa pagë. Mirë ligji, po zakoni. Jemi një familje e madhe. Nuk mund të mjaftohemi me artimetikën e numrit. Ne do të shkojmë përtej këtij numri, që të gjitha qelizat familjare të këtij vendi, që nuk po funksionojnë që të mos u mungojë, jo e gjitha ajo që kanë në kohë paqeje, por ajo që mund të bëjmë. Ne do ia japin edhe gruas së atij kryefamiljari, pagën e luftës. Në këtë mënyrë cdo i regjistruar me apo pa pagë si i vetëpunësuar nga familja, do të marrë një pagë lufte dhe shuma 710 mln lekë të reja të deklaruara nga ata që e kanë mbyllur biznesin do të bëhet 1.57 mld lekë të reja, do të japim dyfishin e shumës së deklaruar. Duke kompensuar të gjithë të punësuar apo vetëpunësuarit në një biznes të vogël që nuk punojnë për shkak të luftës. 60440 persona janë këta që nuk do i lëmë vetëm” shkruan Rama.
Po ashtu, qeveria ka pezulluar edhe koncesionet: rruga ‘Milot-Balldren’, rruga ‘Orikum-Dukat’ dhe koncesioni i skanerave të doganave, koncesionin e laboratorëve të analizave, teksa disa ditë me parë është lajmëruar edhe pezullimi i koncesionit të ‘Check Up-it’.
