Shumë vende të botës po preken nga kriza energjitike ndërkohë mes tyre pritet të jetë edhe vendi ynë ku është paralajmëruar se do të shoqërohet me çmime marramendëse. Ky problem mjaft shqetësues është prekur edhe gjatë diksutimit në mbledhjen e samitit Brdos të Ballkanit Perëndimor dhe Bashkimit Evropian, ditën e sotme në Slloveni.
Në përfundim të këtij samiti Presidentja e Komisionit Evriopian Ursula von der Leyen është pyetur nga stafi i gazetarëve në lidhje me këtë temë. Në përgjigjen e saj, Von der Leyen është shprehur se “Sa i përket rritjes së çmimit të energjisë, është e qartë që 90% e gazit është e importuar. Kemi detyra për të përmbushur, do të kemi një deklaratë ditët në vijim lidhur me këtë çështje. Do të shohim edhe veprimin tonë në planin afatgjatë”.
Një pjesë e shkëputur nga konferenca:
Pyetje: Çfarë kredibiliteti ka zgjerimi, çfarë mund t’i japë qytetarëve në rajon? Rritja e çmimit të energjisë dhe reforma në energji, të gjithë presin që BE të veprojë, çfarë mund të bëjë BE lidhur me këtë?
Presidentit të Këshillit Europian, Charles Michel: Ne ndjejmë nevojën, rëndësinë për të vepruar, mbi të gjitha për prioritetet, për reformat, vlerat, investimet, dhe kemi qenë mjaft aktivë ditët e kaluara për të ndihmuar, për të lehtësuar dhe mbi të gjitha për të bërë progres. Kemi pasur dhe një darkë informale dhe sot kemi dhënë shembuj konkretë. Nëse duam të jemi më efikasë e më të vendosur, na duhen patjetër edhe rezultate të tjera. Megjithatë, kemi treguar përfshirje konkrete. Vendet e Ballkanit Perëndimor janë partnerët tanë dhe dëshirojmë të bashkëpunojmë me ta.
Sa i përket rritjes së çmimeve të energjisë, do diskutojmë në takime të tjera. Do të bëhen përgatitje serioze, në mënyrë që të japim disa orientime. Dhe do të kemi edhe mbështetjen e Komisionit Evropian lidhur me këtë. KE do të publikojë një deklaratë lidhur me këtë çështje, në mënyrë që të kemi të gjithë një informacion të përbashkët. Të punojmë për këtë, që të japim orientimin tonë në një tjetër nivel. Do ishte mirë të gjenim një qasje të përbashkët lidhur me këtë.
Von der Leyen: Sa i përket procesit të zgjerimit, kemi diskutuar shumë. Pjesa më e madhe e liderëve të BE kanë shprehur mbështetje që të ecim përpara me Shqipërinë dhe RMV. Urojmë shumë që të ketë një zgjidhje të çështjes mes RMV dhe Bullgarisë. Fakti që ne po investojmë 30 miliardë euro në rajon, flet vetë. Jemi shumë të bindur që kjo nuk do të ketë benefite vetëm për vende te Ballkanit Perëndimor, por edhe për BE, dhe do të lehtësojë rrugën drejt BE.
MICHEL:TE PUNOJME LIDHUR ME BASHKEPUNIMET EKONOMIKE
Presidentit të Këshillit Europian, Charles Michel tha se vlerat themelore, sundimi i ligjit, lufta kundër korrupsionit janë në ADN-në evropiane.
“Këto gjithashtu duhet të jenë zgjedhja për qeverinë e Ballkanit Perëndimor. Ka një diskutim të vazhdueshëm midis 27 për kapacitetin tonë për të pranuar të ardhmen e Evropës, ne duhet të punojmë më tej”, tha Michel.
Kreu i KE deklaroi se vendet duhet të punojnë për bashkëpunimet ekonomike. Ai theksoi se inovacionet teknologjike janë me shumë rëndësi.
“Të punojmë lidhur me bashkëpunimet ekonomike. Inovacionet teknologjike janë me shume rëndësi. Kemi treguar angazhim për të punuar me NATO-n. Jemi përballur me probleme gjeopolitike, por do të shohim se si do të ecim përpara me këto. Aleancat janë të forta. Ashtu siç është dhe me SHBA-në.”, tha ai.
Duke u ndalur sërish te rritja e çmimit të energjisë elektrike, Michele tha se janë disa elemente që kanë nxitur deri këtu.
“Ka disa elemente që kanë çuar në rritjen e energjisë, për të dhënë më pas një përgjigje. Kur të kemi një pamje të qartë dhe mbi të gjitha se çfarë mund të bëjmë për ta zgjidhur këtë, do të japim një deklaratë.”, tha ai.
