Teksa prej disa ditësh Shqipëria nuk po gjen qetësi nga ngjarjet kriminale, deputeti demokrat, Ervin Salianji ka ironizuar kryeministrin Edi Rama dhe ministrin e Brendshëm Bledi Çuçi, duke kujtuar një shprehje popullore si “rrufeja nuk bie në Parlament”.
“Duke qenë se në çdo rrugë, qytet, institucione që nuk mund të preken si media, ka shpërthyer dhuna… kemi ndonjë risk ne që vijmë në punë apo nisemi nga parimi që nuk bie rrufeja në Parlament?
Në kushte të tilla të degradimit të rendit dhe sigurisë publike, dhe ku qytetarët ndihen të pasigurt duhet që kryeministri dhe ministri i Brendshëm ta lënë luftën nga tëitteri dhe të vijnë këtu. Është seanca e parë pas ngjarjeve të pandodhura në vend dhe ata nuk paraqiten, ashtu si dhe drejtori i policisë nuk paraqitet në komision për të dhënë shpjegime”, tha ai.
Kujtojmë që brenda pak ditësh në 2 ngjarje kriminale kanë humbur jetën 2 të pafajshëm, mëkati i vetëm i të cilëve është që punonin në vendin e gabuar.
Fillimisht Mimoza Paja u qëllua për vdekje në 12 mars në zonën e Don Boskos në Tiranë, gjatë orarit të punës si banakiere në një lokal, i cili ishte në pronësi të një personi me precedent kriminal. Mendohet se shënjestra ishte pikërisht pronari, Fation Murataj, por atentatorët nuk kursyen askënd.
Ndërkohë 2 ditë më parë një sulm me armë iu bë televizionit Top channel, ku mbeti i vrarë roja i godinës Pal Kola.
