Masakra zgjedhore që është bërë në Shqipëri në vitet e fundit ku partitë kanë bërë “kasaphanë” me manipulime dhe me blerje votash, nuk ka mbetur jashtë optikës së ndërkombëtarëve dhe më tepër të amerikanëve.
Ambasadorja amerikane shprehu bindjen se, SPAK do të “ndërmarrë veprime” për dosjet e “Dibrës” dhe Durrësit”, lidhur me krimet zgjedhore.
“Mendoj se tani që SPAK është funksional plotësisht, kur paraqiten prova të qarta, ata do të ndërmarrin veprime”,- tha Kim në një intervistë në emisionin “Opinion”, transmetuar këtë të Enjte.
Drejtuesi i emisionit, Blendi Fevziu: Ambasadore, problemi është që asnjë nga njerëzit që kanë blerë vota apo kanë krijuar probleme me votat nuk është ndëshkuar. E dini mirë që ka dy dosje në duart e drejtësisë për rastet e Dibrës dhe Durrësit, por askush nuk është çuar në gjykatë për këto krime.
Ambasadorja Kim: Mendoj se tani që SPAK është funksional plotësisht, kur paraqiten prova të qarta, ata do të ndërmarrin veprime.
E pyetur gjatë një interviste në emisionin “Opinion” lidhur me komentet e vazhdueshme në media, se ndërkombëtarët janë të njëanshëm në qëndrimet e tyre, Ambasadorja Yuri Kim, tha se, ky është një keqkuptim i diplomacisë.
Ajo u shpreh se, përfaqëson qeverinë e vendit të saj, si një diplomate e dërguar nga Presidenti Amerikan.
Blendi Fevziu: Mendoj se ka shumë komente në median shqiptare, nga analistë apo gazetarë, madje edhe nga Presidenti i Republikës, që thonë se ambasadat apo komuniteti ndërkombëtar pretendon të jetë i pavarur, por në fund, mbështet qeverinë. A është e vërtetë kjo?
Ambasadorja Kim: Unë mendoj se ky është një keqkuptim i diplomacisë. Si diplomate, në rastin tim, më ka dërguar Presidenti i Shteteve të Bashkuara që të përfaqësoj qeverinë time dhe vendin tim dhe, kuptimi i kësaj është që, në radhë të parë, angazhohem me qeverinë që është zgjedhur në mënyrë legjitime, apo jo? Kjo përfshin Kryeministrin, Presidentin, por përfshin edhe pjesën tjetër të vendit, pra flas me qytetarë të zakonshëm, flas edhe me opozitën. Nuk është mbajtje ane. Nuk është kjo ajo që bëjmë.
Blendi Fevziu: Si është marrëdhënia juaj me Presidentin e Republikës? Mendoj se ka pasur një marrëdhënie të vështirë me Ambasadën e SHBA, përfshi ish-ambasadorin Donald Lu dhe ju aktualisht.
Ambasadorja Kim: E di që doni të kem një rol në telenovelën e brendshme dhe e kuptoj këtë, por ajo që mund të them është kjo: puna ime është shumë specifike. Jam këtu për të përfaqësuar një palë, dhe kjo është Shtetet e Bashkuara të Amerikës. Përpiqem të ndërtoj marrëdhënie pozitive, produktive me cilindo që është në pushtet dhe kjo përfshin Presidentin, Kryeministrin, udhëheqësin e opozitës, njerëz të zakonshëm, dhe bëj më të mirën që mundem.
/Burimi: Tv Klan /GazetaReforma.com/
