Kreu i Lidhjes Demokratike të Kosovës, Lumir Abdixhiku i ka kërkuar kryeministrit Albin Kurti që të mos bëjë viktimën kur është e panevojshme. Kjo deklaratë lidhet me dialogun Kosovë-Serbi, dokumentet e të cilit i janë dorëzuar Kurtit ditën e pranimit të detyrës, sipas Abdixhikut. Kreu i LDK-së shkruan nëse Kurtit i janë dashur informata, mund t’i kërkonte para se të ankohej te miqtë ndërkombëtarë.
Postimi i plotë i Abdixhikut:
Kryeministër,
Të bësh politikë është një gjë. Të bësh viktimën kur s’je i tillë është e panevojshme – është dobësi.
Dokumentet e dialogut të janë dhënë ditën e pranimit të detyrës. Është ajo dosja e kaltërt që pason me dorështrëngim nga paraardhësi yt. Aty i ke 29 faqe raport. I ke edhe dokumentet e dakorduara në secilin takim. E ke pozicionin politik të Kosovës, e analizën e ekspertëve – të njëjtëve që i ke angazhuar tani për konsultim.
Nëse s’i mbanë mend, ke mundur të pyesësh. Nëse i ke humbur, ke mundur t’i kërkosh sërish.
Nëse të janë dashur informata shtesë nga njerëzit e mi në LDK, jemi pesë minuta larg në Prishtinë. S’jemi të huaj kur është në pyetje vendi. E duam barabartë të gjithë.
Ke mundur ta bësh secilin hap ndryshe përveç ankimit para miqve jashtë. Trego përgjegjësi. S’je më opozitë. Tani je Kryeministër. Udhëheq si i tillë.
